اللهم إني اسألك من فضلك العظيم
'شايف' إبن خالتك إللي إشترى شقة جديدة كاش في التجمع و أنت لسه قدامك ٣ سنين على ما تخلص قسط العربية الكحيانة بتاعتك .. طب 'شايف' صاحبك اللي ورث مصنع أبوه و ما شاء الله راكب مرسيدس و مقضيها في مراسي طول الصيف .. طب بلاش .. 'شفت' زميلك في الشغل اللي عنده بيزنس في دبي و كل يوم بييجي الشغل بعربية تخليك تفتح بقك من هول الصدمة و بيعمل فلوس هو شخصياً ميعرفش عددهم .
 |
| اللهم إني اسألك من فضلك العظيم |
'شفت' ؟!
طب 'إسمع' دي :
{وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ}
سمعت ؟
طب فهمت ؟!
فهمت إن ربنا نهانا نهي صريح وواضح في القرآن إننا نبص على اللي في أيد غيرنا ؟
بس إستنى بس رايح فين .. أنا مكملتلكش الآيه على فكرة .. باقي الآيه بتقول
{وَرِزْقُ رَبِّكَ خَيْرٌ وَأَبْقَىٰ}
.. يعني أيه بقى !؟
اللي ربنا رزقك بيه خَيْرٌ وَأَبْقَىٰ ليك من اللي أنت منبهر بيه ده .. اللي إنت منبهر بيه ده ممكن يكون خَيْرٌ وَأَبْقَىٰ ليه هو .. إنما ليك أنت .. إللي معاك هو اللي خَيْرٌ وَأَبْقَىٰ ..
مش مصدقني صح ؟!
بلاش تصدقني أنا .. صدَّق الذي خلق الأرض و السماوات العلا طيب !!
طب إسمع دي بالمرة طالما وصلت في القراية لغاية هنا بقى :
{وَلَا تَتَمَنَّوْا مَا فَضَّلَ اللَّهُ بِهِ بَعْضَكُمْ عَلَىٰ بَعْضٍ ۚ لِّلرِّجَالِ نَصِيبٌ مِّمَّا اكْتَسَبُوا ۖ وَلِلنِّسَاءِ نَصِيبٌ مِّمَّا اكْتَسَبْنَ ۚ وَاسْأَلُوا اللَّهَ مِن فَضْلِهِ ۗ إِنَّ اللَّهَ كَانَ بِكُلِّ شَيْءٍ عَلِيمًا}
المرة الجاية لما تشوف حد أحسن منك أو عنده نعمه مش عندك متحطش وشك في الأرض و تمشي زي كل مرة و تقعد طول الليل تاكل في نفسك و تندب حظك و تلوم نفسك على تقصيرها ..
المرة الجايه بعد ما تقول "ما شاء الله لا قوة إلا بالله" ..
تقول تبارك الله
قول .. "اللهم إنِّي أسألك من فضلك العظيم" .
تعليقات