فنون التثبيت

لا مش إعلان جل شعر

دا الحل السريع لكل الناس

يعنى يوسف السباعى فى رائعته ارض النفاق كان فيه حبوب نفاق وكدب وشجاعه

إنما حبوب التثبيت كان نساها مع إنها موجوده من زمان أوى أيوه التثبيت من زمان مع إن مفيش حد بياخد باله منه

أيوه وكلنا بنثبت بعض يعنى من اكبر راس فى الدوله لأضغرها فضلم يقول لنا الكادر وما الكادروالناس تحلم

وتعديلات دستوريه تعدى وناس تموت وكله يهون عشان الكادر مع إن مفيش كدر أصلا

وده تثبيت إحدى طرق تثبيت الحاكم لشعبه

ونسينا اكتر واحد كان بيثبت فى العالم جمال عبد الناصر المثبت الكبير

وده يعوز مدونه كامله مش بوست ده جاب من الآخر التثبيت موجود فى كافة تعاملتنا

وانت شطارتك يعنى أنا مثلا أبقى راجع من الشغل طالع روحى أسأل امى انت عامله

تقولى سمك من إللى أنت بتحبه

مع إنى مبحبش السمك بس هى عاوزه تبين إن هي بتعمل إللى أنا بحبه

وهى عارفه أنا بحب إيه وبكره إيه بس تعرف اكتر تثبتنى

والتثبيت موهبه فطريه إزاى مريم بنت أخوى أول متشوفنى تيجى تاخدنى بالحضن

إزيك ياعمو وحشنى أنا بحبك اوى أنا بحبك أكتر من بابا وبعد ما البنت تثبتى بمسامير عشره سم تقولى

معك فكه هات فلوس اروح اجييب شيبسى من الكبير لنا إحنا لإتنين وتاخد الفلوس ومعدش ألاقيها

إلا المره الجايه وهى بتعمل نفس المسلسل وأنا زى الشاطر بديها الفلوس مريم دى عندها أربع سنين

يعنى لسه متعرفش حاجه معنى كده إن هى مولوده بموهبة التثبيت

وهنا صنف آخر من التثبيت وهو الصامت يعنى مثلا

كان لنا بن خاله البليه لعبت معاه مره واحده معاه عربيه رينو ميجان

وكل شويه يدبح ويوزع لله سمعنا إن بشغل فلوس الناس فى المزادات

وبيا خد نسبه ومره واحده جالنا ابن خالتنا

واول ماشوفناه من غير ما نكلم جرينا جبنا الفلوس

وهو آعد ساكت عارف هو بيعمل إيه من غير ما يكلم واحنا بنبص

للعربيه ولا لاب توب والموبايل وخاد الفلوس من غير مايكلم وراح راح راح

والفلوس راحت معاه

معنى دا انه استخدم حاجه غير الكلام فى انه يثبتنا ودا التثبيت الغير لفظى

التثبيت عنده قدره غير عاديه انه يتمص غضب اى انسان

د يعنى مثلا النت لما يفصل ببقى رايح لعمرو بتاع النت وانا هطلع روحه

واول ماروح له يبص لى بإهتمام ويقولى إوعى تقولى النت فاصل أنا لسه باصص عليه

وهو عارف النت فاصل وراح له عشرين واحد قبلى وهو قلهم نفس الكلام المهم

يقولى روح البيت هتلاقى النت أطير أروح البيت مفيش اى حاجه أولع أكتر اروح له وانا مولع

يقولى تعالى بص على الموقع ده أبص وروح مروح زى الشاطر وانسى أنا كنت رايح ليه

وممكن يكون التثبيت للاإرادى بمعنى إن إحنا لو بنحب حد

تلاقينا بنثبت فيه من غير ما نعرف ولا نقصد

وبتكون عملية التثبيت ناجحه لو توافر فيها عدة شروط زى

ان المثبت يلعب على عاطفة إللى بيثبته بمعنى إن يفصل عقله خالص

يتحكم فى عاطفته ويكون التأثير اكبر لو كان العاطفه فيها نوع من الحرمان عند إللى بثبت

وشروط اخرى توافق اللفظ مع الغير لفظى

بمعنى نغمة الصوت

حركات الوجه

الوقت المناسب القرب

والبعد مع إللى بيثبت الوقت المناسب

وإلا هتتحول لعملية تثبيت كاذب فاقدة التأثير

صدقتونى لما قولت لكم دا فن وعلم

بس لازم يكون فيه موهبه فطريه تتنمى بعد كده بتكرار والخبره

التثبيت بيفيد ناس كتير اوى ممكن يخليهم معاهم فلوس

ناجح فى حياته العاطفيه والإجتماعيه

بل ممكن توصل لأعلى المناصب

وممكن تبقى رئيس وكل واحد وقدرته التثبيتيه

صدقتونى لما قولتلكم إن دا علم وفن يستحق الدراسه